Plantun de Prouvènço

Pèr coumpara dos planto d'encò nostre

Imperata cylindrica & Plumbago europaea

Imperata cylindrica

Poaceae Graminaceae

Nom en français : Impérata cylindrique.

Descripcioun :
Grando gramenouso que trachis dins la sablo en ribo de mar o de ribiero, s'atrobo souvènt coutrìo emé la cano-de-Ravenno. Li fueio soun longo e rede emé uno lingueto ciliado. Fai uno poulido paumo en formo d'espigo de 8 à 20 cm, e di proun sedouso. Douno de coulounìo bonodi si rizoumo pouderous.

Usanço :
Counèissèn pas d'usanço particulié en Prouvènço. La meno roujo "Rubra", de Chino, es utilisado dins la couagulacioun dóu sang e contro d'ùni malautié.

Port : Grando erbo
Taio : 40 à 120 cm
Fueio : costo paralèlo
Tipe bioulougico : Geoufite
Cicle bioulougico : Planto renadivo

Gènre : Imperata
Famiho : Poaceae
Famiho classico : Graminaceae

Coulour de la flour : Blanco
Petalo : ges
Ø (o loungour) enflourejado : 8 à 20 cm
Flourido : Printèms - Estiéu

Sòu : Ca
Autour basso e auto : Pancaro entresigna
Aparado : Noun

Liò : Mar - Sablo - Ribiero
Estànci : Termoumediterran à Mesoumediterran
Couroulougi : Cousmoupoulito
Ref. sc. : Imperata cylindrica (L.) Räusch., 1797

Erbo-di-rascas

Plumbago europaea

Plumbaginaceae

Àutri noum : Erbo-enrabiado, Bagoun, Erbo-de-la-rougno, Erbo-di-couquin, Malo-erbo.

Noms en français : Dentelaire, Malherbe.

Descripcioun :
L'erbo-di-racas, mens coumuno qu'à passa tèms, trachis en ribo de camin, i pèd de muraio e dins lis escoumbre ounte flouris amé de poulìdi flour vióuleto, à la fin de l'estiéu. Es uno planto eisado de recounèisse emé si flour e si fru pegous qu'arrapon li péu e li teissu.

Usanço :
Èi couneigudo au nostre pèr garris la rasco. Ramentèn qu'aquesto malautié de pèu e de péu s'aprèn à de champignoun coume Microsporum canis. Freta la bèsti emé d'òli de bagoun (adouba en fasèn bouli la planto dins l'òli). Se dis peréu qu'en mastegant la racino, apaisso li ràbi de dènt (erbo-enrabiado)-TdF. Pamens se n'en fau mesfissa que fretado sus la pèu pòu douna d'enflamacioun.